Paul Kagame n’Ubushake bwo Gukoresha Social Media mu Kurengera Isura ye

Ku wa 25 Kanama 2025, Perezida Paul Kagame yagejeje ijambo ku basirikare, abapolisi n’abacungagereza barenga 6,000 mu Kigo cya Gisirikare ya Gabiro, mu Ntara y’Iburasirazuba. Iki kiganiro cyibanze ku mutekano w’igihugu, imyitwarire ikwiriye kuranga inzego z’umutekano, ndetse n’ibibazo byo mu karere. Mu magambo atari asanzwe, Kagame yasabye ko Abanyarwanda bose bagomba gukoresha social media mu gusubiza ibivugwa kuri we n’u Rwanda. Yemeje ko iyo umuntu avuze ku Rwanda, aba avuze kuri we ubwe, bityo ko ari inshingano za buri wese kumurengera no kurengera igihugu.

Aya magambo agaragaza byinshi ku miterere y’ubutegetsi bwe: gukoresha igitugu mu gucunga ibitekerezo, gusibanganya itandukaniro hagati y’igihugu n’umuyobozi, no kubaka ishusho y’impimbano imbere y’amahanga.

Mu bihugu bifite demokarasi, Perezida ni umuntu watoranyijwe, ashobora kunengwa cyangwa kugaragazwaho amakosa, ariko ibyo ntibihita byitirirwa igihugu cyose. Mu Rwanda, Kagame akoresha imvugo ishyira igihugu n’umuyobozi mu cyiciro kimwe. Bivuze ko umuntu uvuga ku Rwanda aba yibasira Kagame, kandi unenga Kagame aba yibasira igihugu.

Iyi mvugo igamije guca intege abantu bose bashobora kugira igitekerezo gitandukanye. Buri wese utavuga nk’ubutegetsi ashyirwa mu rwego rw’“abanzi b’igihugu”. Ni uburyo bwo gukomeza igitugu, aho ubuyobozi budashaka gutandukanya igihugu n’umuyobozi umwe.

Mu Rwanda, itangazamakuru riragenzurwa bikomeye. Freedom House ishyira igihugu mu cyiciro cya “Not Free”, ivuga ko ubwisanzure bwo kuvuga bumeze nabi. Human Rights Watch na Amnesty International bigaragaza ko abanyamakuru, abanyapolitiki n’abaharanira uburenganzira bwa muntu bahura n’itotezwa, gufungwa no gutotezwa. Reporters Without Borders (RSF) ivuga ko u Rwanda ruri mu bihugu bifite igitutu gikomeye ku itangazamakuru, aho benshi mu banyamakuru bahunze cyangwa bakabura.

Urugero rugaragara ni urupfu rw’umunyamakuru John Williams Ntwali mu 2023, rutigeze rukorwaho iperereza ryigenga nubwo imiryango mpuzamahanga yarusabye. Ibi byose bigaragaza ko igihugu kirangwa n’ubutegetsi bw’igitugu, aho inkuru zose zigomba kujya mu murongo w’ubutegetsi.

Social Media nk’Intwaro

Perezida Kagame ubwe afite konti ku mbuga nkoranyambaga nka Twitter (X), Facebook, na YouTube. Aho kwifashishwa nk’uburyo bwo gutanga ijwi ritandukanye, social media mu Rwanda ikoreshwa mu kwamamaza ibikorwa bya Leta no gusubiza abayinenga. Minisiteri n’inzego zitandukanye za Leta zifite social media zikora nk’amaso n’amatwi ya Leta. Hari n’itangazamakuru rya Leta kandi naryo rikoresha social media zibanda kuri Kagame. Ibyo ariko kuri Kagame ntibihagije. Ntibimuhagije na gato.

Kuba Perezida Kagame asaba abaturage bose kuyifashisha mu kumurengera bisobanura ko social media ihindutse intwaro ya propaganda, aho kuba urubuga rw’ubwisanzure. Abavuga ibitandukanye baribasirwa, abandi bakitwa abanzi b’igihugu.

Ipfunwe n’Ubwoba

Nubwo afite ubutegetsi bukomeye mu gihugu imbere, Kagame aracyafite ipfunwe. Impamvu:

• Diaspora nyarwanda, cyane cyane mu Burayi no muri Amerika, ikomeza gutanga amakuru y’uko mu Rwanda hadakurikizwa uburenganzira bwa muntu.
• Raporo za HRW na Amnesty zerekana gufungwa no gutotezwa kw’abatavuga rumwe.
• RSF igaragaza ko itangazamakuru rigenzurwa cyane, kandi abanyamakuru bagera kuri benshi barahunze cyangwa baricwa.

Ibi byose bigaragaza ko n’ubwo mu gihugu imbere ahacunze, Kagame atinya ukuri gutambuka hanze. Ni yo mpamvu yifuza ko buri muturage aba “umurinzi w’isura ye” kuri social media.

Iyo abaturage basabwa kuba abarinzi b’isura y’umuyobozi, bahindurwa ibikoresho aho kuba abafite ijwi. Social media irahinduka urubuga rw’igitugu, aho gutanga ibitekerezo bisigara ari icyaha. Abaturage benshi baracecetse, abandi bakoresha amazina y’amayoberane, abandi bagahitamo guceceka burundu.

Ibi byose byerekana ko ubwisanzure bukomeza kugabanuka, kandi igihugu kikiyubakira ku gitugu aho ku bwisanzure.

Perezida Kagame yubatse ishusho y’u Rwanda mu maso y’amahanga nk’igihugu gifite iterambere, umutekano n’imiyoborere myiza. Iyi shusho ikunze kwitwa na bamwe “well-camouflaged dictatorship” – ubutegetsi bw’igitugu bwihishe inyuma y’imyitwarire myiza.

Ariko inyuma y’iyo shusho, ukuri ni uko abaturage babujijwe ubwisanzure, abatavuga rumwe barafungwa cyangwa bakicwa, itangazamakuru rigenzurwa, kandi abaturage bahindurwa abakozi b’ubutegetsi mu kwamamaza isura y’umuyobozi umwe.

Amagambo ya Perezida Kagame yavugiwe i Gabiro ku wa 25 Kanama 2025 agaragaza uburyo ubutegetsi bwe bukoresha igitugu, igenzura no kubeshya mu gucunga ibitekerezo no kurinda isura ye. Kuba abaturage basabwa kuba abarinda isura ya Perezida ku mbuga nkoranyambaga si uburyo bwo kubaka igihugu cy’ubwisanzure, ahubwo ni uburyo bwo gusibanganya ukuri no kubeshya amahanga.

Mu by’ukuri, u Rwanda rwa Kagame rwubatse ishusho nziza y’impimbano mu maso y’amahanga, ariko imbere mu gihugu, abaturage bafashwe nk’ibikoresho, ubwisanzure bw’umuturage buhinduwe icyaha, kandi igihugu cyose gikomeza kwiranywa n’ umuyobozi umwe  wacyo ariwe Paul Kagame.

Claude Banyamfura
Rwandan Rights Alliance